Ekonomiese Kommentaar: November 2017

Posted on

Wêreldwye ekonomiese groei lyk steeds gesond, alhoewel dit nog nie floreer nie. Die vernaamste aanwysers dui op goeie momentum in die herstel van die ekonomie. Die aankoopbestuurdersindeks (PMI) vir vervaardiging was in besonder sterk: die ISM-aanwyser in die VSA het tot sy hoogste vlak sedert 2004 gestyg, die Chinese se amptelike PMI is die hoogste sedert 2012, en dieselfde geld vir die Europese industriële produksiemaatstawwe. Globale handelsgroei was ook indrukwekkend en dit wil voorkom asof dit binnekort ‘n hoogtepunt sal bereik, maar behoort ‘n geruime tyd positief te bly.

‘n Groot deel van die wêreld het vir eers alle kommer oor deflasie opsy geskuif en die volgehoue ​​lae globale inflasie het sentrale banke in staat gestel om hul heersende monetêre beleid te handhaaf ten spyte van bogenoemde gesonde groei. Lae inflasie het batepryse (beide effekte sowel as aandele) ondersteun en gebalanseerde portefeulje-opbrengste versterk. Die verhouding tussen groei, indiensneming en kerninflasie is nie meer so duidelik as in die verlede nie. Hooflyn- én kerninflasie in die VSA en die Eurosone bly steeds op koers, ten spyte van historiese lae werkloosheidsvlakke. Ons siening is steeds dat daar ‘n risiko is van hoër inflasie. Die gevaar vir effekte is dat selfs die kleinste verhoging (so min as 0.10%) in die maandelikse Kern-Indeks vir Private Verbruiksbesteding in die VSA die koersverwagtinge van die Federale Reserweraad vinnig kan verhoog.

Verder met betrekking tot die Federale Reserwebank, het President Trump, Jerome H. Powell genomineer om as Voorsitter oor te neem wanneer Janet Yellen se termyn in Februarie 2018 verstryk. Yellen was wel vir ‘n tweede kwartaal beskikbaar, maar Trump het ‘n plaasvervanger verkies wat na verwagting op koers sal bly wat die monetêre beleid betref indien die Amerikaanse ekonomie se bestendige ekonomiese groei voortduur.  Intussen het die Goeweneur van die Bank van Engeland, Mark Carney, die eerste verhoging in die amptelike bankkoers in tien jaar aangekondig nadat sewe uit die nege lede van die monetêre beleidskomitee ten gunste van ‘n styging van 0,25% tot 0,5% gestem het. In die toekoms behoort monetêre beleid steeds die wêreldekonomie te ondersteun, maar dit sal minder ondersteuning vir batepryse bied.

Suid-Afrika

Goeie nuus is wel dat die Suid-Afrikaanse ekonomie in die tweede kwartaal van 2017, uit sy eerste resessie sedert 2009 gekom het, aangesien huishoudelike verbruik en landbou noemenswaardig verbeter het. Ten spyte van die herstel op ‘n kwartaalbasis, ervaar die handels- en vervaardigingsektore steeds ‘n inkrimping, gemeet oor ‘n jaar-op-jaar-basis.

Suid-Afrika se PMI, soos saamgestel deur die Buro vir Ekonomiese Ondersoek (BEO), het in September op ‘n vlak van 44 vir die vierde agtereenvolgende maand onder 50 gebly. Die derde kwartaal-gemiddeld van 44, is die laagste in agt jaar. Dit dui ongelukkig nie op enige beduidende herstel in die plaaslike ekonomie nie.

Die 2017 mediumtermyn-begrotingsraamwerk (MTBR) het baie meer mediadekking as in vorige jare geniet. Dit is as gevolg van Minister Gigaba se eerste amptelike begrotingstoespraak, asook die treurige toestand van Suid-Afrika se fiskus.  ‘n Donkerder prentjie is geskets as wat die meeste markontleders verwag het. Die minister se boodskap was eerlik, reguit en ‘n duidelike oproep tot aksie, maar ongelukkig is niks hiervan aangebied nie. Die aansienlike toename in die begrotingstekort vir die volgende drie jaar en die swak ekonomiese groeivooruitsigte, skets ‘n scenario van skuld tot BBP wat vinnig tot onvolhoubare vlakke gaan styg. Die goeie nuus is dalk dat  die ekonomiese aannames wat vir die vooruitskattings in die raamwerk gebruik is, moontlik te pessimisties is en dus ruimte laat vir ‘n positiewe verrassing.

Volgens Granate Asset Management, verhoog die aansienlik slegter vooruitsig van die MBTR die risiko van ‘n kredietafgradering in November. Hulle glo egter dat ten minste een van Moody’s of S&P sal wag tot na die regerende party se verkiesingskonferensie voor hulle ‘n besluit neem. Alhoewel hulle glo dat ‘n afgradering vir Suid-Afrika op die kaarte is in 2018, gee hulle toe dat ‘n positiewe politieke uitkoms in Desember dit moontlik kan voorkom.

Markprestasie

Tydens die twaalf maande periode wat op 31 Oktober geëindig het, het groeibates (eiendom en aandele) hul sterk prestasie voortgesit. In Oktober het die JSE Indeks van Alle Aandele 6,3% hoër gesluit, en die rollende twaalf-maande prestasie na meer as 20% geneem. Hierdie prestasie is deur ‘n paar baie groot aandele (insluitend Naspers, Anglo American, BHP Billiton en Richemont) aangedryf. Heelwat beleggingsfondse sou nie deelgeneem het aan die volle markgroei nie, aangesien sommige van hierdie groot kapitalisasie-multinasionale maatskappye baie duur lyk op verskeie fundamentele waardasiemaatstawwe.

Interessant genoeg, het kleinhandel-bankdeposito’s in Suid-Afrika vanaf April 2015 van sowat R700 miljoen tot meer as R1 triljoen in April vanjaar gestyg. Dit is waarskynlik dat baie beleggers wat oor die afgelope twee jaar van een of ander vorm van aandele- en effektemarkblootstelling na kontant oorgeskakel het, steeds in die geldmark belê is en daarom goeie opbrengste verbeur het.

Internasionale aandele het steeds besonder goed presteer in beide Amerikaanse Dollar-terme (MSCI Wêreldindeks van Alle Lande op 24% oor die jaar), sowel as die plaaslike geldeenheid, wat bykans 30% aan randgebaseerde beleggers gelewer het. Ontluikende markte het beter gevaar as ontwikkelde markte en het die jaar 33% hoër (in randterme) geëindig. Met ‘n algemene swak plaaslike geldeenheid oor twaalf maande, het selfs internasionale effekte absolute opbrengste verhoog.

Markaanwysers 31 Oktober 2017
(Alle opbrengste in Rand) 3 maande 12 maande
   
SA Aandele (JSE Indeks van Alle Aandele) 8.1% 20.1%
SA Eiendom (SAPY) 4.0% 11.1%
SA Effekte (SA Indeks van Alle Effekte) -0.2% 5.0%
SA Kontant (STeFI) 1.8% 7.6%
Globale Ontwikkelde Aandele (MSCI Wêreldindeks) 11.9% 29.5%
Ontluikende Mark-aandele (MSCI Indeks vir Ontluikende Markte) 13.0% 33.1%
Globale Effekte (Barclays Globale Indeks van Alle Effekte) 6.9% 6.1%
Rand/Dollar 7.2% 4.9%
Rand/Sterling 8.0% 14.1%
Rand/Euro 5.9% 11.5%

 

Kommentaar – Die grootte-effek

Markopbrengste oor ‘n aantal tydperke het die afgelope tyd dikwels tydens gesprekke met kliënte voorgekom, met die afgelope jaar s’n veral relevant. Vir die eerste keer in ‘n lang tyd, is beleggers in meer riskante bates beloon vir die bykomende risiko geneem. Beide Suid-Afrikaanse en internasionale aandele en eiendom het beter gevaar as effekte en kontant, gemeet oor die afgelope twaalf maande. Een jaar is egter ‘n baie kort tydperk in beleggings. Die feit bly staan dat aandeelbeleggers oor langer periodes, steeds ‘n groter beloning (oftewel risikopremie) sal geniet omdat hulle hul kapitaal aan hoër vlakke van korttermyn-onsekerheid blootstel.

‘n Bateklas wat dalk die afgelope paar jaar misgekyk is, verseker deur Suid-Afrikaanse beleggers, is klein kapitalisasie-aandele. Oor lang genoeg tydperke het hierdie bateklas in ons plaaslike aandelemark met meer as 1% per jaar beter gevaar as groot kapitalisasie-aandele. Dit is ‘n noemenswaardige premie vir beleggers met langtermyngroei as oogmerk en ‘n betekenisvolle bydrae tot welvaartgroei. Oor die twaalf maande tot einde Oktober het groot kapitalisasie-aandele met 23% gestyg en klein kapitalisasie-aandele met slegs 4%. Dit kan waar wees dat klein kapitalisasie-aandele hoofsaaklik aan die plaaslike ekonomie blootgestel is (wat nie juis goed vaar nie) en weerspieël daarom die gebrek aan verwagte groei in Suid-Afrika. Dit sal egter van meer waarde wees om akademiese bronne te raadpleeg om die bestaan ​​van ‘n risikopremie op klein kapitalisasie-aandele oor die volle beleggingsiklus te ondersoek.

In ‘n onlangse publikasie (“The Size Effect”) bestudeer en ontleed Dr Hamish Macalister van Firth Investment Management in Singapoer die beskikbare akademiese literatuur oor hierdie aangeleentheid in diepte. Dr Macalister kom tot die gevolgtrekking dat dit belangrike bewyse uitlig vir beter risiko-aangepaste opbrengste by klein, lae likiditeitsfirmas wat deur markdeelnemers geïgnoreer is (min tot geen analisedekking, geen media aandag, ens.). Die literatuur bied ook bewyse van uitprestasie vir beleggers met plaaslike kundigheid in sulke aandele, relatief tot buitelandse beleggers, veral in ontluikende markte.  Onlangse akademiese navorsing beklemtoon die belangrikheid om te onderskei tussen lae kwaliteit aandele en hoë kwaliteit aandele. Daar is klinkklare bewyse dat die grootte-effek beide groot en statisties betekenisvol is vir hoë kwaliteit, klein firmas en onbeduidend (of negatief) vir lae kwaliteit, klein firmas.

Alhoewel daar op die oog af waarskynlik bewyse is dat die grootte-premie nie bestaan ​​nie, is hierdie resultaat van geen waarde wanneer die kwaliteit van die aandele in ag geneem word.  Klein firmas, lae kwaliteit (waarvan daar proporsioneel meer is as lae kwaliteit, groot firmas) verlaag in effek die grootte-premie na statisties onbeduidende vlakke. Daar is sterk bewyse van ‘n aansienlike grootte-premie wanneer lae kwaliteit, klein firmas  onderskei word van hoë kwaliteit, klein firmas. Asness et al (2017) vind dat hierdie resultate ooreenstem met likiditeitsgebaseerde verduidelikings vir ‘n grootte-premie, en nie met risiko-gebaseerde of gedragsverduidelikings nie.

Hulle navorsing dui oor die algemeen daarop dat die grootte-premie ‘n werklikheid is vir hoë kwaliteit, klein firmas. Dit impliseer dat gehalteoorwegings van kardinale belang is wanneer portefeuljebestuurders aandele kies in die klein firma-sektor. As professionele beleggers, word ons aandag altyd deur die onderprestasie van ‘n bateklas getrek. Die onlangse swak prestasie van Suid-Afrikaanse klein kapitalisasie-aandele kan dalk net ‘n geleentheid wees vir die verstandige (en dapper) belegger. Solank jy beplan om lank genoeg te belê, is dit dalk nou ‘n goeie tyd om die “grootte-effek” tot jou voordeel te gebruik.

Soos die gebruik in die verlede, sal geen maandelikse state en omsendskrywes gedurende Desember uitgestuur word nie. Ons kantore sal gesluit wees vanaf die 22ste Desember 2017 en heropen op Woensdag 3 Januarie 2018.

Die direksies van Pentagon Financial Solutions en Associated Portfolio Solutions wil graag hierdie geleentheid gebruik om al ons kliënte ‘n vreugdevolle feestyd, en ‘n voorspoedige 2018 toe te wens. Wees verseker dat ons sal voortgaan om u beleggings met die grootste sorg en verantwoordelikheid te bestuur.

Gods rykste seën.


Leave a Reply

Your email address will not be published. Required fields are marked *

four × two =

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>