Ekonomiese Kommentaar

Posted on

Internasionaal

 2017 was ‘n jaar van veerkragtigheid op die internasionale ekonomiese front. Die vernaamste aanwysers in die meeste ontwikkelde ekonomieë neig opwaarts en daar is oral sprake van ‘n gesinkroniseerde internasionale herstel. Dit was duidelik in die kapitaalmarkprestasie gedurende die afgelope twaalf maande.

Die aankoopbestuursindeks (PMI) vir vervaardiging se aanwysers was besonder sterk teen die einde van 2017: die ISM-vervaardigingsindeks in die VSA het tot sy hoogste vlak sedert 2004 gestyg. Die Chinese se amptelike PMI is die hoogste sedert 2012 en die Europese samestelling is die hoogste sedert 2011.

Reële sektordata was nie naastenby so positief nie en die konsensus rondom vooruitsigte vir groei was dus redelik beperk. Volgens die Bloomberg-meningsopname, sal Amerikaanse en Europese ekonomiese groei waarskynlik effe afneem na die 2017-prestasie. Die voortgesette tekort aan beduidende inflasionêre druk in ‘n omgewing waarin werkloosheidsyfers daal, bly steeds ‘n raaisel. Hooflyninflasie, en meer spesifiek kerninflasie bly onder die doelwit in die VSA en die Eurosone. Daar is egter ‘n paar tekens wat daarop dui dat inflasie in die VSA begin styg en moontlik tot ‘n voortgesette verhoging in Amerikaanse rentekoerse kan lei. Die Federale Reserweraad se 0,25%-verhoging in Desember het byna ongesiens verbygegaan, aangesien dit algemeen verwag is en alhoewel die raad van goewerneurs drie verdere verhogings in 2018 adverteer het, verwag die mark slegs een.

Die ekonomiese siklus in die Verenigde State is reeds in ‘n gevorderde en volwasse fase, maar nader nog geensins ‘n piek nie. Die ekonomiese momentum wat 2018 inlei, is sterk en behoort die jaar deur te sien. Groei sal gedryf word deur voortgesette opbrengste in kapitaaluitgawe en matige vordering in verbruik en behuising.

Chinese ekonomiese groei speel steeds ‘n kardinale rol in ‘n globale sin, veral met betrekking tot kommoditeite. Industriële kommoditeitspryse het 2017 sterk afgesluit; tot ‘n groot mate te danke aan bewyse van ‘n gesinkroniseerde internasionale ekonomiese herstel. Tog dreig onheilswolke op die horison. Ontwikkelde markte se ekonomiese groei is minder kommoditeitsintensief as in die verlede en dit is China se ekonomiese momentum wat ‘n dominante rol sal speel wanneer die aanvraag vir industriële metale in 2018 bepaal word. Chinese ekonomiese aktiwiteite sal waarskynlik merkbaar afneem oor die komende maande, wat dan volatiliteit en ‘n groter kans op verliese vir kommoditeite sal meebring. Die

internasionale ekonomiese vooruitsigte vir 2018 word dus gekenmerk deur voortgesette ​​gesinkroniseerde groei, maar later in die jaar kan dinge dalk hier en daar begin skeef loop.

Suid-Afrika

Cyril Ramaphosa se verkiesing tot President van die African National Congress (ANC) het die nuusopskrifte in Desember oorheers. Die samestelling van die top ses lede van die Nasionale Uitvoerende Komitee (wat drie lede van die sogenaamde Zuma-kamp bevat) kan die nodige belangrike en verreikende veranderinge meer ingewikkeld maak, maar oor die algemeen word dit beskou as ‘n positiewe uitkoms vir beide die regerende party sowel as vir die land. Die rand het bykans 10% versterk (teenoor die USD, EUR en GBP) deur die loop van die maand, maar dit kan ook te danke aan ‘n verbetering in Suid-Afrika se handelsvoorwaardes en tekort op die lopende rekening wees. ‘n Toenemende handelsurplus het gebaat by stygende kommoditeitspryse en globale sentiment jeens die rand na die ANC-konferensie kon dalk ook ‘n rol gespeel het in die versterking van ons plaaslike geldeenheid. Kapitaalvloei het egter nie heeltemal so ‘n rooskleurige prentjie geskets nie. Ons het ‘n groot uitvloei van effekte gesien sedert die mediumtermyn-begrotingsraamwerk in Oktober en die gevolglike afgraderings deur kredietagentskappe.

In kontras met die res van die wêreld, bly Suid-Afrika se reële ekonomiese groei swak en sal waarskynlik nie meer as 1% in 2018 wees nie. Daar mag dalk ‘n verwagting wees dat die Suid-Afrikaanse Reserwebank die rentekoerse verder sal verlaag om die sukkelende ekonomie ‘n hupstoot te gee, maar toenemende fiskale risiko’s en die gevolglike effek op die rand deur middel van verdere kredietafgraderings is die hoofrisiko’s op die sentrale bank se horison.

Ná die lopie in Desember, vertoon…

die rand nou sterker as fundamentele faktore en is nou ál meer kwesbaar op verskeie gebiede.

Die risiko van ‘n kredietafgradering deur Moody’s na die Februarie-begroting blyk hoog te wees, ten spyte van die ANC-verkiesing se uitkoms. Hierdie afgradering en die nagevolge van die daaropvolgende uitsluiting van die Wêreld Staatseffekte Indeks, kan daartoe lei dat die plaaslike geldeenheid die winste wat dit die afgelope maand verdien het, sal moet prysgee en daarna sywaarts sal verhandel vir die res van die jaar.

Markprestasie

Plaaslik het die Steinhoff-debakel gedurende Desember heelwat aandag geniet. Die aandeelprys het in ‘n tydperk van minder as twee weke bykans 90% van sy waarde verloor as gevolg van die bedanking van die Hoof Uitvoerende Beampte, Markus Jooste. Hierdie stap was genoodsaak nadat moontlike rekeningkundige ongeruimdhede aan die lig gekom het. Die meeste beleggers in pensioenfondse en effektetrusts sou tot ‘n mindere of meerdere mate blootstelling aan hierdie aandeel gehad het en sien met gretigheid uit na meer duidelikheid rondom Steinhoff se finansiële toestand wanneer die resultate teen 31 Januarie 2018 bekend gemaak gaan word.

Tydens die 2017-kalenderjaar was groeibates die beste presteerders, maar terselfdertyd moet genoem word dat al die breë bateklasse positiewe resultate gelewer het. Die goeie prestasie van die rand in Desember het die effek wat globale ontwikkelde markaandele op portefeuljes gehad het, beperk en dit het Suid-Afrikaanse aandele (21%) en ontluikende markaandele (25%) die geleentheid gebied om die jaar af te sluit as die bateklasse wat die beste presteer het in randterme. Plaaslike effekte het gebaat by laer opbrengskoerse en het die jaar afgesluit met dubbelsyferprestasie (10% hoër).

Ontluikende markaandele was steeds ‘n uitblinker bateklas oor een jaar in Amerikaanse Dollar terme – die MSCI Ontluikende Mark Indeks het in 2017 bykans 38% toegeneem. Die Amerikaanse Dollar was grotendeels verlede jaar swakker en het byna 10% aan die Rand afgestaan oor die laaste jaar, met die Sterling en Euro min of meer onveranderd teenoor ons plaaslike geldeenheid.

Suid-Afrikaanse Multi-Bate hoë ekwiteits-fondse het in 2017 gemiddeld 10% aan beleggers gelewer met hul lae ekwiteits-eweknieë wat 8,4% beloop. Met die inflasiesyfer op ongeveer 5% gedurende verlede jaar, het beleggers in hierdie portefeuljes vir die eerste keer in ‘n paar jaar ‘n opbrengs verdien wat meer as inflasie is.

 

Markaanwysers 31 Desember 2017
(Alle opbrengste in Rand) 3 maande 12 maande
   
SA Aandele (JSE Indeks van Alle Aandele) 7.4% 21.0%
SA Eiendom (SAPY) 8.3% 17.2%
SA Effekte (SA Indeks van Alle Effekte) 2.2% 10.2%
SA Kontant (STeFI) 1.8% 7.5%
Globale Ontwikkelde Aandele (MSCI Wêreldindeks) -3.2% 11.4%
Ontluikende Aark-aandele (MSCI Indeks vir Ontluikende Markte) -1.4% 24.7%
Globale Effekte (Barclays Globale Indeks van Alle Effekte) -7.3% -2.8%
Rand/Dollar -8.3% -9.5%
Rand/Sterling -7.6% -0.9%
Rand/Euro -6.9%  3.1%

Leave a Reply

Your email address will not be published. Required fields are marked *

4 × 5 =

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>