Ekonomiese Kommentaar – Februarie 2018

Posted on

Internasionaal

Daar is reeds ‘n maand van die nuwe jaar agter die rug en ons sien steeds geen tekens dat die gesinkroniseerde wêreldwye herstel begin verlangsaam nie. Daar is oor die algemeen heelwat bewyse dat die momentum in internasionale groei volhoubaar is en die belangrikste globale aanwysers het sedert middel-2017 verbeter. Wees egter gewaarsku – China mag dalk die een uitsondering wees.

Die konsensus rondom verwagte internasionale ekonomiese groei in 2018 is 3,7%. Dit is net matig hoër as die 3,6% groei in 2017, maar steeds ‘n goeie verbetering op 2016 se ekonomiese groeikoers van 3,2%. Die Amerikaanse ekonomie se groeivooruitsigte is besonder optimisties. Sterk momentum in ekonomiese aktiwiteit gekombineer met die voorafgaande voordele van belastingverlagings, behoort groei in reële terme tot ongeveer 2,5% te neem. Soos vroeër genoem, kan Chinese groei egter vir teleurstelling sorg. In absolute terme, groei die wêreld se tweede grootste ekonomie steeds teen 6,5%. Dit is volgens die regering se vooruitsigte vir groei; die amptelike groeisyfer behoort ten minste hierdie teiken te haal. Onderliggende reële groei sal waarskynlik tussen 5% en 6% wees, dieselfde as die afgelope paar jaar. Bygesê, dit sal nie soveel tot internasionale groei bydra as wat dit het sedert die vroeë 2000’s nie, en ‘n relatiewe verlangsaming in veral hul huismark kan nadelig wees vir kommoditeite.

Tegemoetkomende fiskale beleid sal voortgaan om ekonomiese uitbreiding in 2018 en selfs tot in 2019 te ondersteun terwyl kwantitatiewe verruiming deur die Europese Sentrale Bank en die Bank van Japan sal opmaak vir die stadige vermindering van die Amerikaanse Federale Reserweraad se balansstaat. Tot drie Amerikaanse rentekoersverhogings word verwag en die mark behoort dit relatief maklik te absorbeer, selfs as dit ‘n mate van korttermyn-volatiliteit sou veroorsaak, soos ons die afgelope tyd gesien het.

Hierdie lewendige en positiewe mark gaan egter met ‘n paar risiko’s gepaard. Die een, waarvan nou baie gelees word, is dat daar ‘n moontlikheid van oorverhitting van die Amerikaanse ekonomie is. ‘n Tweede risiko is dat finansiële markte fundamenteel duur is wanneer dit gemeet word teen hul langtermyn-waardasies, en dit op sigself kan ‘n markineenstorting veroorsaak. Dít sal skade berokken aan ontluikende markbates en -geldeenhede en kan selfs internasionale ekonomiese groei vertraag. Laastens kan kommer oor politieke onstuimigheid in die Midde-Ooste, Noord-Korea en Europa (Brexit, Katalonië en Italië) ook die internasionale groei strem.

Suid-Afrika

Die hoop is daar dat die veranderinge in Suid-Afrika se politieke omgewing die plaaslike ekonomie in ‘n nuwe rigting sal stuur. Die verwagting is dat die BBP-groeikoerse oor die volgende paar jaar sal verbeter, maar nie tot inspirerende vlakke nie. Die plaaslike ekonomiese agtergrond (soos hierbo beskryf) moet ondersteunend bly ten opsigte van groeivooruitsigte in Suid-Afrika. Ten spyte van ‘n duidelike afname in politieke risiko’s, is die soewereine kredietgradering steeds in gevaar van verdere afgraderings. Dit werp op sigself tog maar ‘n skadu van onsekerheid oor vertrouensvlakke (besigheid en verbruiker) en kan gevolglik in die pad staan van ‘n positiewe uitkoms van oninspirerende ekonomiese toestande.

Vanuit ‘n geldeenheidsperspektief, behoort die rand hierdie jaar aan te hou versterk, met die ondersteuning van verbeterde plaaslike fundamentele faktore. Verder vorentoe en in 2019 kan die rand weer onder druk geplaas word wanneer die tempo van internasionale groei begin verswak en die lopende rekening weer begin groei.

Die groei in BBP kan 1,3% bereik in 2018 en 1,6% in 2019, hoofsaaklik gedryf deur sikliese faktore en vertrouensvlakke wat van historiese lae vlakke herstel. Die Suid-Afrikaanse Reserwebank sal na verwagting die rentekoerse op die kort termyn onveranderd hou. Hooflyninflasie sal na verwagting gemiddeld net onder 5% vir die jaar bly, gegewe dat geen geldeenheidverrassings op ons wag nie.

Dit lyk asof die Suid-Afrikaanse ekonomie ‘n verbetering in groeitempo gaan toon, maar hou nietemin in gedagte dat dit steeds vanuit ‘n agterstand teenoor die res van die wêreld sal wees. ‘n Positiewe verrassing in die BBP-syfers sal nietemin goud werd wees vir maatskappye met ‘n plaaslike fokus.

Markprestasie

Januarie was ‘n onindrukwekkende maand in terme van groeibates en die FTSE/JSE Alle Aandele Indeks het die maand onveranderd geëindig. Plaaslike eiendomseffekte is swaar geraak deur verskeie gerugte rondom verdere Viceroy-verslae oor spesifieke Suid-Afrikaanse maatskappye en het bykans 10% afgestaan gedurende die maand. Fortress Income Fund B (-28,7%), NEPI Rockcastle (-24,7%) en Resilient (-23,0%) was van die groot eiendomsaandele wat gely het onder die negatiewe sentiment.

Die Amerikaanse dollar het aanhou verswak teenoor die meeste ander geldeenhede en dit het ontluikende mark-geldeenhede (die rand ingesluit) bevoordeel. Ontluikende markaandele het die jaar baie goed afgeskop, aangesien die effektemark die beste Januarie in ses jaar gelewer het. Aandelemarkte het wêreldwyd goeie opbrengste hierdie maand gesien met die meeste van die indekse wat nuwe hoogtes bereik het, alhoewel stygende effektekoerse in ontwikkelde markte tog effense wisselvalligheid veroorsaak het.

Uit die perspektief van ʼn Suid-Afrikaanse belegger, het die krag van die Amerikaanse dollar sterker prestasie in globale aandele verminder – oor die afgelope jaar het die MSCI Wêreldindeks meer as 26% in Amerikaanse dollars gestyg, maar daar teenoor slegs 11,4% in randterme.

In die plaaslike mark het finansiële aandele (-3%) die afgelope maand die meeste gesukkel terwyl industriële aandele redelik onveranderd gebly het en hulpbronaandele (3,2%) die uitblinkers was. Suid-Afrikaanse Staatseffekte  (1,9%) was die top-presterende breë bateklas vir die maand.

Suid-Afrikaanse Multi-Bate Hoë Aandeel-fondse het ‘n gemiddeld van 8,4% oor die afgelope 12 maande aan beleggers gebied, terwyl hulle lae aandeel-eweknieë slegs 7,4% gelewer het. In beide gevalle het die gemiddelde fonds in hierdie sektore die maand min of meer onveranderd afgesluit.

 

Markaanwysers 31 Januarie 2018
(Alle opbrengste in Rand) 3 maande 12 maande
SA Aandele (JSE Indeks van Alle Aandele) 1.2% 16.1%
SA Eiendom (SAPY) -4.3% 3.9%
SA Effekte (SA Indeks van Alle Effekte) 6.6% 10.8%
SA Kontant (STeFI) 1.8% 7.5%
Globale Ontwikkelde Aandele (MSCI Wêreldindeks) -8.4% 11.4%
Ontluikende Mark-aandele (MSCI Indeks vir Ontluikende Markte) -5.5% 24.7%
Globale Effekte (Barclays Globale Indeks van Alle Effekte) -13.8% -5.3%
Rand/Dollar -16.0% -11.9%
Rand/Sterling -10.1% – 0.4%
Rand/Euro -10.2%   1.5%

 

Kommentaar –“Lies, damn lies, and statistics”

Mark Twain het bekendheid aan hierdie uitdrukking verleen in 1906 in Chapters from My Autobiography: “Figures often beguile me,” het hy geskryf, “particularly when I have the arranging of them myself; in which case the remark attributed to Disraeli would often apply with justice and force: ‘There are three kinds of lies: lies, damned lies, and statistics.’”

So baie kan versteek word in statistiek, “(t)he practice or science of collecting and analysing numerical data in large quantities, especially for the purpose of inferring proportions in a whole from those in a representative sample.” Om saam te vat, statistiek is die proses waarmee data verminder word. Die uitkoms is dat minder syfers (of selfs slegs ‘n enkele syfer) groot datastelle verteenwoordig sonder dat te veel van die eienskappe van die oorspronklike data verlore gaan.

Soms, soos ons volgende sal bespreek, is dit nie haalbaar nie. Dit is verstaanbaar dat beleggers teleurgesteld is wanneer hulle verneem dat die Suid-Afrikaanse aandelemark (soos gemeet deur die FTSE/JSE Alle Aandele Indeks) met 21% gestyg het, maar hul jongste kwartaalstaat dui op ‘n jaarlikse verbetering van slegs die helfte van dié persentasie. Dit is as gevolg van die invloed wat ‘n aandeel soos Naspers op ‘n gekonsentreerde mark soos ons plaaslike beurs gehad het. Oor die laaste jaar het Naspers sowat die helfte van die opbrengste van die FTSE/JSE Alle Aandele Indeks bygedra. Sou dit uitgesluit word, sou hierdie hoogtemerk die jaar slegs 11% hoër afgesluit het. Dit is nie ‘n ongewone ervaring vir Suid-Afrikaanse beleggers nie. Dimension Data, Anglo American en BHP Billiton het almal soortgelyke paadjies geloop voor hulle uiteindelik hard aarde toe gekom het:

FEB27 Afr

Kliek om te vergroot.

Gegewe die stewige portefeuljesamestelling, is dit moeilik om te regverdig hoekom jy 25% van jou beleggings in een maatskappy sal plaas, in hierdie geval Naspers. Alhoewel dit amper die helfte van die groei in SA se aandelemark in een jaar bygedra het, is dit geensins onmoontlik dat dit dieselfde waarde weer net so maklik van markprestasie kan ontneem nie. In Maart 2009, nege maande nadat hulle pryse ‘n spits bereik het, was Anglo American en BHP Billiton tussen 60% en 70% laer.

Om ons punt verder te staaf oor die risiko’s verbonde aan te veel eiers in een mandjie, verwys ons na ‘n werklike voorbeeld waarmee ons onlangs in aanraking gekom het: aan die einde van 2017,het iemand wat onlangs na ‘n lang loopbaan by Steinhoff afgetree het, een van ons beleggingsvennote genader. Die belegger het geen skuld nie en het ‘n portefeulje opgebou van meer as R15 miljoen wat vir die meeste Suid-Afrikaners ‘n baie gemaklike aftrede kan sorg. Die belegger het nie die raad gevolg om na ‘n wyer verskeidenheid sekuriteite te diversifiseer nie, aangesien “Steinhoff my nog nooit teleurgestel het nie.” Die gebeure rondom Steinhoff in Desember waarvan die meeste mense nou reeds bewus is, het ongelukkig binne ‘n kwessie van dae hierdie aftreeportefeulje verander na een van minder as R2 miljoen.

Soms lewer ‘n gekonsentreerde weddenskap fantastiese vrugte. Maar dit is ongelukkig presies wat ‘n gekonsentreerde portefeulje is: ‘n weddenskap. Meer gereeld as nie, voorsien diversifikasie jou beskerming van jou rykdom wat deur harde werk oor jare opgebou is. Ek is seker almal sal saamstem dat dit ‘n les is waarvoor dié afgetredene hierbo ‘n paar miljoen sou betaal.


  • GUDRUN DU TOIT

    My geld het in twee maande met R300 000 geval. Verlede jaar het dit net met R200 000 gegroei. As dit hierdie jaar so aangaan gaan ek al die pad verloor. Dit is my pensioen.

    Reply

    • leandra Post author

      Ons waardeer u kommentaar. Die 5,55% wat u portefeulje in Rand waarde gedaal het sedert ons gedurende November verslag gedoen het, is direk te wyte aan die verstewiging van die ZAR. Ons geldeenheid het 13.13% verstewig teenoor die dollar tussen 30 Nov en 28 Feb, te danke aan President Ramaphosa wat verkies is tot voorsitter van die ANC.

      Dit is belangrik om nie u portefeulje op ‘n termyn so kort as 3 maande te evalueer nie, aangesien u portefeulje in geheel bestuur word met ‘n beleggingstermyn van minstens 5 jaar. So ‘n portefeulje wat inlasie + 5% moet behaal oor die langtermyn het dikwels korttermyn fluktuasies .

      Reply

Leave a Reply

Your email address will not be published. Required fields are marked *

eight − seven =

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>