Ekonomiese en Markoorsig – Maart 2018

Posted on

Internasionaal

Ekonomiese vooruitsigte lyk wêreldwyd steeds gunstig ten spyte van gemengde data vanuit die Eurosone en China gedurende die afgelope paar maande. Die lesings van die aankoopbestuursindeks (PMI) vir vervaardiging vir die meeste ekonomieë bly konsekwent met sterk uitset groei vir 2018. China is hier die uitsondering met ‘n versagting in die vervaardigingsdata wat dui op ‘n verlangsaming in die onderliggende aanvraag gedurende die loop van die jaar. Aangesien hul ekonomie (nou die tweede grootste in die wêreld) steeds meer as 5% per jaar groei (die amptelike groeikoers is 6,5%), lewer hulle steeds ‘n beduidende bydrae tot die globale ekonomiese uitset.

Reële sektor data dui sover breedweg op goeie internasionale groei vir 2018. Wat daarná voorlê is nog duister. Alhoewel die IMF ‘n jaarlikse BBP-groei van 3,9% gedurende die volgende twee jaar verwag (in vergelyking met ‘n groeikoers van 3,5% per jaar op die lang termyn), dui Bloomberg se konsensus voorspellings eerder op ‘n verlies in momentum in 2019.

‘n Struikelblok vir internasionale groei is steeds die proteksionistiese beleid van die VSA wat nou duidelik meer as nét retoriek is. Dít is die les van verlede week se aankondiging dat President Trump ‘n bevel sal onderteken waarin globale tariewe van 25 persent op staal en 10 persent op aluminium gehef gaan word. Op sigself is hierdie tariewe nie so belangrik nie. Ingeligte toeskouers behoort egter bekommerd te wees oor die rasionaal wat aangevoer word om dit te regverdig, die voorgestelde vlak en tydsduur, die bereidwilligheid om naaste bondgenote by te kom asook oor die President se uitlating dat “trade wars are good and easy to win”.

Volgens die Financial Times is die Internasionale Monetêre Fonds heeltemal korrek deur hierdie plan te kritiseer. Dit sal aansienlike kostes meebring, alliansies opbreek en verseker lei tot verdere proteksionisme wat ‘n klomp geld sal kos, vir sowel die VSA as ander. Dit is die gevolg ‘n kenmerkende samevloei van selfbejammering (die wêreld is lelik met ons) en onbeskoftheid (ons kan ander maklik boelie om ons sin te kry). Die resultaat sal heel waarskynlik verdere aftakeling van die reeds gehawende toestand van internasionale handel wees.  Dit kan, op die ou end, wêreldwyd finansiële markte ‘n skok toedien.

Suid-Afrika

RMB Global voorspel ‘n verbetering in ekonomiese groei vanaf  ‘n geskatte 0,9% in 2017 tot 1,3% en 1,6% in 2018 en 2019 onderskeidelik. Alhoewel dit ‘n beduidende verbetering op laasjaar is, is dit vanaf  ‘n baie lae basis en ver onder die globale groeikoers van byna 4%. Die goeie nuus is dat die drie hoofaandrywers van Suid-Afrikaanse ekonomiese prestasie – internasionale groei, kommoditeitspryse en die reële effektiewe wisselkoers – almal ter ondersteuning van binnelandse groei is. As gevolg van ‘n gebrek aan vertroue plaaslik en ekonomiese groei wat nie in lyn is met globale groei nie, beteken die verwagting vir ‘n herstel in verbruikers- en sakevertroue egter dat plaaslike groei kan terugkeer na historiese vlakke in ooreenstemming met die wêreldwye groei. Daar word verwag dat inflasie ongeveer 5% sal bly oor die volgende twee jaar en dit kan ‘n geleentheid skep vir die Suid-Afrikaanse Reserwebank om rentekoerse te verlaag. Ten spyte van  afwaartse  aanpassings  van  beide  hooflyn- en  kerninflasie, het die Reserwebank by hul laaste  vergadering  besluit om rentekoerse onveranderd te hou op 6,75% met die risiko van ‘n moontlike swak geldeenheid indien Moody’s, wat SA se kredietgradering onder hersiening geplaas het, die plaaslike geldeenheid na sub-beleggingsgraad afgradeer, as rede. Fiskale beleid, Moody se afgradering en die rimpel-effek op die rand bly steeds die grootste struikelblokke vir  rentekoersverlagings – iets wat ons plaaslike ekonomie broodnodig het.

Markprestasie

Effekte het in Februarie geval na die Voorsitter van die Amerikaanse Federale Reserweraad, Jerome Powell, aangedui het dat koersverhogings dalk meer aggressief sal wees as wat verwag is. Effektekoerse het die hoogte in geskiet ná hierdie opmerking, wat die aandelemark op sy beurt dus laat tuimel het. Op die plaaslike front het positiewe sentiment rondom Cyril Ramaphosa se verkiesing, plaaslike aandele ‘n stewige hupstoot gegee terwyl die sterker wordende rand daartoe gelei het dat multinasionale maatskappye onderpresteer het. Die prys van beide plaaslike en globale eiendomseffekte het aansienlik afgeneem (hoewel die redes vir hul afname verskil het). Globale eiendomseffekte het gely onder stygende globale effekte opbrengste, terwyl die SA genoteerde eiendomsektor se val hoofsaaklik toegeskryf kan word aan die swak prestasie van drie aandele (Resilient,  Fortress Income Fund B en NEPI Rockcastle). Die rand het aanhou versterk teen die meeste ander geldeenhede en dit het druk geplaas op die prestasie van globale aandele in Suid-Afrikaanse portefeuljes. Tydens die afgelope jaar het die MSCI Wêreld Indeks meer as 18% teenoor die Amerikaanse dollar gegroei, maar slegs 6,5% in rand terme.

 

Markaanwysers 28  Februarie 2018
(Alle opbrengste in Rand) 3 maande 12 maande
   
SA Aandele (JSE Indeks van Alle Aandele) -2.2% 17.4%
SA Eiendom (SAPY) -15.4% -6.1%
SA Effekte (SA Indeks van Alle Effekte) 11.9% 14.3%
SA Kontant (STeFI) 1.8% 7.5%
Globale Ontwikkelde Aandele (MSCI Wêreldindeks) -11.4% 6.5%
Ontluikende Mark-aandele (MSCI Indeks vir Ontluikende Markte) -7.3% 18.2%
Globale Effekte (Barclays Globale Indeks van Alle Effekte) -12.9% -4.3%
Rand/Dollar -13.5% -9.8%
Rand/Sterling -11.9% -0.1%
Rand/Euro -11.5% 3.6%

Leave a Reply

Your email address will not be published. Required fields are marked *

12 − four =

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>